Muhwelelwa kha bulayo wa Univen o haneliwa beiḽi!

Tshiṱori nga Elmon Tshikhudo. Ṱhalutshedzo nga Khathutshelo Raliphaswa.

Muhwelelwa ane a khou hweswa mulandu wau vhulaha we avha e mutshudeni wa Univen Vhulondo Nevhukalanga (19) o amba uri ho ngo mu vhulaha nga khole, a tshi khou kombetshedza uri o ita zwa u ḓitsireledza.

Muhumbulelwa, Sifundo Masindi, mutshudeni wa miṅwaha ya 20 wa saintsi ya mupo wa ṅwaha wa vhuvhili na museisani wa Nevhukalanga, u khou sedzana na milandu ya u mu ṱhavha u swika a tshi lovha.

Tshiwo itshi tsho itea nga la 29 dza Ṱhangule he Masindi ovha a tshi dzula hone, vhudzulo ho tendelwaho nga yunivesithi ngei Ngovhela.

Masindi wa Miluwani o di vhonadza khothe ya madzhisitarata ya Thohoyandou nga Musumbuluwo, 8 Nyendavhusiku, u ita khumbelo ya beili. Khumbelo yawe ya beili, yo ṋetshedzwaho nga tshivhumbeo tsha linwalo la afidavithi, yo fhiriselwa phanḓa u swika nga ḽa 9 Nyendavhusiku, nga Lavhuvhili.

Kha afidavithi, i tshi vhaliwa nga muimeleli wawe, Masindi o amba uri u fanela u vhofhololwa nga beili sa izwi o vha a songo ḓiimisela u vhulaha Nevhukalanga. O amba uri o ita zwithu nga u ḓitsireledza nga murahu ha musi hu tshi pfi o lingedza u mu ṱuṱuwedza. Muvhuso, naho zwo ralo, wo vhidza muofisiri wa ṱhoḓisiso, we a landula zwine zwa khou ambiwa nga ha muimeleli wawe. Khaṱhulo kha khumbelo ya beili yovha yo vhetshelwa Ḽavhuṱanu, fhedzi vha khothe vho hana iyo khumbelo ya beiḽi.

Nevhukalanga, ane ovha e kha nwaha wa u thoma  wa vhutsila kha buḓo la luambo, vho lovha nga murahu ha u ṱhavhiwa lunzhi-lunzhi musi a tshi khou dalela mufunwa wawe. Zwidodombedzwa zwine zwa khou ranga phanḓa kha tshiwo a zwi athu pfala, fhedzi khakhathi dza vhafunani dzi khou humbulelwa uvha tshi ṱuṱuwedzi.

Vhaṅwe vhagudiswa vho vhiga uri vhenevho vhafunani vho vhonala vho takala musi vha tshi dzhena afho hune Masindi a dzula hone, fhedzi ho pfala phosho khulwane nga murahunyana. Vhaofisiri vha tsireledzo vho wana Nevhukalanga o wanala o huvhala lwa vhukuma lufherani, tsini hovha hu na lufhanga lwo ḓalaho malofha. Masindi o farwa henefho fhethu nga murahu ha u lingedza u shavha nga u fhufha nga fasiṱere ḽa vhuimo ha vhuvhili, a tou huvhala kha maitele ayo.

Khombo yo vusa vhuhali khamphasini, zwa ita uri Univen i imise mishumo yoṱhe ya zwa pfunzo nga ḽa 1 Khubvumedzi nga vhuthihi na mupondwa na u gwalabela khakhathi dzo thewaho kha mbeu (GBV). Yunivesithi na madzangano o fhambanaho vho sasaladza nyito nahone vha ita khuwelelo ya u fhelisa GBV na u vhulawa ha vhufumakadzi nga vhunzhi.

Vho Itani Nengudza vha tshiimiswa tsha Man Real Foundation, vhe vha vha vha tshi khou tevhela mulandu, vho ri: “Fulufhelo ḽashu ndi ḽa uri muhwelelwa a nga si ṋewe beili. U fanela u dzula e dzhele u swika kha u fhela ha mulandu wawe.”

Date:15 December 2025

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019. He currently writes on a freelance basis, covering human rights issues, court news and entertainment.

Read: 375