Vendaboy Poet o pfufhiwa pfufho ya vhufumi-rathi

Tshiṱori nga Thembi Siaga. Ṱhalutshedzo nga Khathutshelo Raliphaswa.

Murendi wa sialala na muimbi wa thendo ane a funiwa nga vhathu vhanzhi Vendaboy Poet, o bebwaho sa Lutendo Evens Mugagadeli, o pfufhiwa nga pfufho ya vhuimo hau thoma kha tshiteṅwa tsha Outstanding Performance Award at the inaugural Limpopo Arts and Culture Awards nga Ḽavhuṱanu, ḽa 21 Nyendavhusiku, kha vhuṱambo ho farelwaho Meropa Casino. Pfufho iyi i dzhiela nṱha mushumo wawe kha u vhulunga mvelele, u tandulula mafhungo a matshilisano, na u ṱuṱuwedza zwitshavha nga kha vhurendi.

U wana pfufho zwo vha zwi tshi amba nga maanḓa nga khae. “U ḓivha uhu hu nthusa uri ndi aluwe sa murendi nahone zwi nṱuṱuwedza uri ndi dzule ndi tshi shuma nga maanḓa, zwihuluhulu nga murahu ha lwendo lwanga lwa zwenezwino ngei Yuropa,” o ralo.

Pfufho idzi dzo vha dzo dzudzanyiwa nga Khoro ya Vhutsila na Mvelele ya Limpopo (LACC), nga u shumisana na Muhasho wa Mitambo,Vhutsila na Mvelele (DSAC). Vhaḓivhi vha zwa vhutsila vha maḓana, vhatambi, na vharangaphanḓa vha nḓowetshumo vho vha vhe hone nga madekwana a muzika, u tshina, na vhurendi. Dziṅwe ṱhonifho dzo vha dzi tshi katela Pfufho ya u bveledza lwa Vhutshilo hoṱhe yavho Dokotela Colbert Mukwevho.

Vendaboy o alutshela muvhunduni wa HaNthabalala nahone a thoma u ṅwala na u ita vhurendi nga 2008 musi e tshikoloni tsha nṱha tsha Nthabiseng. Mushumo wawe u katela nyambo dza rathi dzine ndi Sepedi, Tshivenḓa, Tsonga, isiZulu, isiXhosa, na Luisimane - nahone u kokodza nga ha vhufa hawe, mvelele, na tshenzhemo dza vhutshilo.

“Vhurendi ndi nḓila ya maanḓa ya u vhulunga mvelele, u ṱuṱuwedza mulalo, na u ṱanganya vhathu. Vharendi ndi midzio, mulomo, na vhaporofita.Tshiitea tshiṅwe na tshiṅwe tshi fanela u thoma nga vhurendi, na vharangaphanḓa, u bva kha vhomeyara u ya kha mahosi, vha fanela u ṱanganedzwa nga vharendi,” a ralo.

O imela Afrika Tshipembe kha dzitshaka, a tshi khou tamba kha ḽa Germany, Portugal, Spain, Italy, na Switzerland. Ndi ene mutsila wa muvenda fhedzi ane ono renda muphuresidennde vha zwino lune lwa swika luvhili. Pfufho dzawe dzi katela Murendi wa Nṱhesa kha Pfufho dza Muzika wa Tshivenḓa nga 2012 na Murendi wa Nṱhesa kha Pfufho dza Muzika wa Mvelele dza Afrika Tshipembe nga 2018.

Date:02 December 2025

By: Thembi Siaga

Thembi Siaga started as an intern during 2021. He assisted with video photography and editing. He also produced numerous small documentaries, focusing on the Vhembe region and its people. Currently he works as a freelance journalist, covering stories in the Elim area. Thembi studied at the Tshwane University of Technology, where he completed his diploma in Journalism in 2021.

Read: 382